كورتە چیرۆك (سمینارا سەیدای)

  عبدالرحمن بامەرنی

ـ بەرێز دلێ‌ تە نەمینیت، هەر وەكو تۆ ئەتەكێتێن دانیشتنێن ڤی باژێری دزانی، رێزا ئێكێ‌ بتنێ‌ بۆ بەرپرس و رێڤەبەرێن دام و دەزگەهانە و تو دشێی ل رێزا دویێ، جهەكی بۆ خوە پەیدا بكەی و ل سەر كۆرسیەكێ‌ دانیشی!

ئەڤە مەزنترین هۆلا ڤی باژێری یە و بكێمی 800 كەس دشێن ل سەر كورسیكان روونە خارێ‌، لێ‌ یا من هزر نەكری، ئەڤ ژمارە دو جار هند لێهات، ئەگەر ئەڤێن ژ پێرڤە ژی دگەلدا بهێنە هژمارتن.

 ژ نشكەكێڤە چەپ رەپا دەستقوتانا خەلكی، هندی ئێك د هۆلێڤە هەی، ئاگەهی هاتنا سەیدای كرن و هەمی رابوونە ژ پێرڤە و تا سەیدا گەهشتییە سەر دەپێ‌ شانۆیێ‌، دەستێن خەلكی ژ چەپ رەپێ‌ نە د راوەستان، بتنێ‌ ئەڤێ‌ برەخ منڤە نەبیت، خوە ب خواندنا پەرتووكەكێ‌ ڤە مژوولدكر و دا من ژ گومانا پسیاركرنێ‌ رزگار بكەت، گۆتە من: "دیارە ئەڤە جارا ئێكێ‌ یە تو لڤان سمیناران ئامادە دبی؟". ئەڤ پسیارە كر و خواندنا پەرتووكێ‌ بۆ وی ژ بەرسڤا من گرنگتر بوو و من ژی خوە تێنەگەهاند.

ئەڤە نە ئێكەمین سەیدایە لڤی باژێری، هەر كەسێ‌ كورسیەك بدەست كەفت، دبیتە سەیدا سەیدایا خەلكی دگەلدا و هەمی ئەزمانێ‌ خوە بۆ حلی دكەن. هاتنا من بۆ ڤێ‌ هولێ‌، نە دا بۆ سەیدای دەستان بقوتم یان ژی گۆهدارییا ئاخفتنێن وی بكەم، ژبەركو ئەز دزانم ئەو ژبلی پەسنا حزبێ‌ و دەستكەفتێن حزبێ‌ و قوربانیدان و شەهیدێن حزبێ‌ و خەباتا دوور و درێژا حزبێ‌ و گرنگییا رێكخستنێن حزبێ‌ و پیتەدان ب ئەندام و لایەنگرێن حزبێ‌ و گرنگییا ڤانە هەمیان بۆ حزبێ‌ د رۆژەڤا ئەڤرودا و تا دگەهیتە هەلویستێ‌ حزبێ‌ یێ‌ نەگوهور و ئەو لایەنێن دڤێن هەڤركییا حزبێ‌ بكەن و دڤێن ل سەر حسابا حزبێ‌ بچنە د دەستهەلاتێدا، چ تشتێ‌ نوو ناهێتە گوتن.

سمینار بەرەڤ دووماهیێ‌ دچوو و دەستێن گەلەكان د بلندكری بوون و ئەڤێ‌ سمینار پرێڤەدبر، ناڤێن وان كەسان دنڤیسان یێن دڤیان پسیارێن خوە ژ سەیدای بكەن، ئەڤێ‌ برەخ منڤە هێشتا پەرتووكا وی ل بەر چاڤێن وی بوو و خوە بنك منڤە خار كر.

ـ هەر وەكو سمینارا سەیدای ب دووماهی هات؟ ڤێجارێ‌ من هەست كر دێ‌ بەرسڤا من ژ خواندنا پەرتووكا وی گرنگتر بیت و دگەل زڤرینا من بۆ لایێ‌ وی، سوراتییا تیشێرتێ‌ دبەردا، ئەز راكرمە سەر پێیان و دناڤ وێ‌ حەشامەتێرا، مە هەردوویان خوە ل بەردەرێ‌ هولێ‌ دیت و دەما ژ من پرسی تە ژ سمینارا سەیدایی چ فێمكر؟ ئەم گەهشتبووینە نە پەنیەكێ‌ و ب هەمبێزەكێ‌، من بەرسڤا پسیارا وێ ژبیركر.

 

 

 

 

 

• د كوڤارا رامان، ژمارە  262 ل رۆژا 5/3/2019ێ‌ دا هاتیە بلاڤكرن.