جڤاتا مشكان

 

جڤاتا‌ مشكان، نە چیرۆكەكە بۆ زارۆكان هاتبیتە نڤیسین و نە ژی ژوان چیرۆكانە، ئەڤێن چیرۆكنڤیس ژ دورهێلی درەڤن و نەشێن راستەوخو كارێكتەرێن خوە ب مرۆڤان ب شوبهینن.. راشكاوانەتر بێژم، جڤاتا مشكان دەركەفتنەكا دییە ژ تێكستی و ئەڤە ئێكەم جار ژی نینە وەك چیرۆكنڤیسەك من تێكست بجهـ هێلابیت و ئەگەر راستگوتر ژی بێژم، من مشكینی پێخوشترە ژ ئەوا نوكە ئەز تێدا وەك مرۆڤ!

ئەڤا ئەز دێ چیرۆكا خوە ل سەر نڤیسم، گوھورینەكا نەچاڤەرێكری بوو دژیانا مشكاندا روودای! ل دێر زەمانەكی گوند د ئاڤابوون و ھەر تشتەكێ مشكان ڤیابا، ب ساناھی بدەستدكەفت، دیوارێن ئاخێ بوون، بان ئاخ بوو و مشكان زوی رێیا خوە بۆ سەر ستێركی دروستدكر. ژیانا مشكان و بەردەوامییا مشكان و خوشگوزەرانییا مشكان، ھەمی ب ستێركی ڤە یا گرێدایی بوو. لێ دگەل پێلێن گوھورینان، گوھورینێن سیاسی یێن ب سەر مرۆڤاندا ھاتین، مشك ژی كەتنە بەر ڤێ پێلێ و بەرەڤ باژێری و ژیانا باژێری ڤە ھاتن و داكو مشك بشێن دگەل ژیارا باژێری خوە بگونجینن، ژ ژیانا ساددەیا خانیێن ئاخێ بۆ خانیێن كونكریتی و ژ ستێركی بۆ لێنانگەھێ و دەرگەھـ و قفل و كلیلان و ئەوا بۆ وان ل ژیارا گوندان، دناڤ خانیێن ئاخێدا  دقەتییا، ئێدی ل باژێری گوھورین ب سەر ھەمی تشتیدا ھاتن و مشك پێدڤی پلانێن نوی بوون و پێدڤییا وان ب ھەبوونا جڤاتەكا راوێژكاریێ بوو!

 دەرگەھێ ئەندامبوونێ و خوە بەربژێكرنێ ھاتە ڤەكرنێ و سندوقێن دەنگدانێ لناڤا باژێری ھاتنە دینانێ و ھەر تاخەك بۆ بنگەھەكێ دەنگدانێ. سەرسورمان ژی نەمینە خواندەڤایێ‌ هێژا، ژبەركو ئەزێ‌ چیرۆكنڤیس بخوە ژی ئێك ژوان كەسان بووم، یێن من قەستا سندوقێن دەنگدانێ‌ كری و من دەنگێ‌ خوە دایە دەركەفتنا مشكەكی و سەدا سەد ژی من دزانی، مشك بتنێ‌ یێن بەروكێن خوەنە و هەر تشتێ‌ ئەو بچنە دناڤدا، ئەو تشت ژ خێرێ‌ دكەڤیت و ئەگەر تو هەڤتەمەنێ‌ من ژی بی، دێ‌ بیرا تە ل شەرێ‌ گێسكی و ستێركی هێت، چەند جارەكێ‌ ژنكان قیژی ڤەدابانە و گوتبانە ئەڤە مشكە! مە هندی ئێك د مالێڤە هەی، ئەم لدوور دەرئێخستنا وی مشكی دئێك دەنگ بووین! ئەڤە دیتنا من بوو، ژ بۆ مشكان، دەما داخواز ژ من هاتیە كرن، كو ئەز ژی بدەنگێ‌ خوە، بەشداریێ‌ د پروسێسا هەلبژارتنا جڤاتا راوێژكاریا مشكاندا بكەم و من مافێ‌ دەنگدانێ‌ ژی هەبیت.

كاندیدكرنا بەربژێران ل سەر بنەمایێ‌ سەنگا عەشیرێ‌ و پلا وی دناڤ پارتێدا و (واستە و واستەكاریێ‌) نەبوو، ببورن ئەگەر شروڤەكرنەكا زێدەتر بدەمە سەر شێوازێ‌ دەست نیشانكرنا كاندیدان.. ل بەراهیێ‌، مشكێن گەور هەبوون و مشكێن گوهبەل و مشكێن كوری درێژ. هەلسەنگاندنا هەر جورەكی ژی رێكارێن خوە هەبوون، ئەڤ رێكارێن هەنێ‌ ژی دبن چەندین فلتەران را دەرباز دبوون، بۆ نمونە، مشكێن گوهبەل، سالوخەتێن وان چاڤێن وان د بلوق و دفنێن وان درێژ و كوریا وان یا كورت بوو، ئەزموونەكا درێژ دگەل لێنانگەهێ‌ هەیە و ئەوان كێمترین قوربانی د دەستێن كابانیێن مالێدا هەنە و ب دروستكرنا كونێن رەڤێ‌ و خوە تێدا ڤەشارتنێ‌، د پێگوتینە.. مشكێن مەزن و گەور، سالوخەتێن وان ژی د قوت و قەلەون و ب ژیری و پلاندانانێن خوە، هەر جهێ‌ د لێنانگەهێڤە وان بڤێت ئەو قەست دكەنێ‌ و ئەو تشتێ‌ وان دڤێت، دزانن ل كیرێ‌ دێ‌ بدەست كەڤیت.. مشكێن كوری درێژ، سالوخەتێن وان ژی د كوری درێژ و ناڤتەنگ زراڤ و سڤیلانكن، هەر جهێ‌ وان بڤێت دگەهنێ‌ و بۆ رەڤێ‌ ل سەرێ‌ رێزێنە و ئەگەر پێدڤی بكەت، ب دیواران ژیڤە هەلدچن.. نە بتنێ‌ ئەڤ فلتەرە هەبوون، فلتەرێن ناوچەیی و مەرجێن دەست نیشانكرنا كاندیدەكی ل گوندان جوداهیا خوە دگەل دەست نیشانكرنا كاندیدەكێ‌ دی ل باژێری هەیە و دەست نیشانكرنا كاندیدەكێ‌ دناڤ خانیێ‌ هەژارەكیدا دژیت، جوداهیا خوە هەیە دگەل دەست نیشانكرنا كاندیدەكێ‌ دی د خانیێ‌ زەنگینەكیڤە بژیت.

دا كو گەلەك ل سەر دەست نیشانكرنا كاندیدی نە راوەستم، دێ‌ زڤرمە سەر ژمارا كورسیێن جڤاتێ و جوداهیا دناڤبەرا مشكان و مرۆڤاندا، ئەو هەڤركیا دناڤبەرا پارتێن مە یێن سیاسیدا هەین، سالوخەتێن هەر پارتەكێ و ئارمانجا هەر پارتەكێ‌، ئەگەر پرانیا دەنگان بدەستڤە ئینان و دێ‌ شێت چ خزمەتێ‌ كەت؟ هەمان ئارمانج و هەڤركی دناڤبەرا مشكان ژیدا هەیە و كێبركیێ‌ ل سەر دەستهەلاتێ‌ دكەن و ئەو ژی ل سەر ڤی بنەمایی كاندیدێن خوە دەست نیشان دكەن.. كی ژوان بهێتە كاندیدكرن و كی بهێتە دوورخستن؟ كی دێ‌ شێت زێدەتر دەنگان خرڤەكەت و كی دێ‌ دەنگێ‌ خوە دەت و كی دەنگی نادەت؟!

دەما هەلبژارتن بدوماهی هاتین و باشترین مشكێن سەربور د هەڤركیا دگەل مرۆڤاندا هەی و دێ‌ چاوان شێن خوە ژ دربێن وان پارێزن، پرانیا دەنگان بدەست خو ڤە ئیناین.. هینگێ‌ شنوی من زانی، جوداهیا دناڤبەرا دەنگدانا مرۆڤ و مشكاندا چییە و ئەو لدویڤ سەربورێن وی یێن لێنانگەهێ‌، تبلا خوە بۆ دحبری د هەلینن و دەنگێ‌ خوە ددەن، ئەمێن مرۆڤ، لدویڤ بەرژەوەندا پارتا خوە، تبلا خوە د حبری د هەلینین و دەنگێ‌ خوە ددەین!!.