عبدالرحمن بامه‌رنى
ئەگەر ل شورەش و بەرخوەدانێن خوە بزڤرین، بدەهان و سەدان شورەش و بەرخوەدان د مێژوویا كوردیدا دێ كەڤنە بەرچاڤێن مە و ل پرانیا وان، ئەم توشی هنگافتنێ بووینە و بێی كو جارەكێ ژی ئەم ل سەر وان شاشییان راوەستیابین و مە بو خوە كربنە وانە. ئەڤ هنگافتنێن مە ژی، ب وێ نوكتێڤە دچن (دەما زەلامەك ب جاددێدا دچیت و قەلپەكێ موزێ دكەڤیتە بن پیا و پاتك و پاتك ب عەردی دكەڤیت، روژا پاشتر رێكا وی دكەڤیتە هەمان جاددە و قەلپەكێ دیێ موزێ دبینیت، دبێژیت، دێ جارەكا دی پێ من كەڤیتە سەر وی قەلپیڤە و دێ پاتك و پاتك بعەردی كەڤم، بێی كو مفا ژ هەمان شاشی وەربگریت و رێكا خوە ڤەگوهێزیت)، ئها ئەم كورد ژی هەمان رەفتار دوبارە و سێبارە دكەین. رەنگە هەبن بێژن، بارودوخێ سیاسیێ كوردان و جوگرافیا كوردان نە هاریكارن كو كورد د شورەشێن خوەدا د سەركەفتی بن؟ رەنگە وەسا بیت و بەشەك ژ هنگافتن و شكەستنان بۆ بارودوخێن سیاسی و جوگرافیا نە گونجایا كوردستانێ ب هەر چار پارچێن وێڤە بزڤریت. لێ ئەڤە بتنێ نە دووماهیكە، ژبەركو، ئامانج چەند یا ئاسێ بیت و چەند ئاستەنگی هەبن، دڤێت مە خواندنێن تێرو تەسەل بۆ وان ئاستەنگان هەبن، نە بتنێ ئەڤە ژی، بەلكو دڤێت دهەر پێنگاڤەكا ژڤی رەنگیدا، مە خواندن هەبن، ئەم دێ چەند پێنگاڤان پێشڤە چین و دێ چەند پێنگاڤان پاشڤە هێین، دوست و دوژمنێن خوە دیار بكەین و هەردەم مە دەزیەك هەبیت بۆ زڤرینێ، ئەگەر ئەم توشی هنگافتنێ بوین. دڤێت ئەم هەمی ئەگەران بێخینە بەر گومانێ و باشترین بەلگە ژی، ئەڤ روودانێن دوماهیێ نە، چ ل بەری 16ی ئوكتوبەرێ یان پشتی هینگێ و تا دگەهیتە روودانێن عەفرینێ و ئەڤێن دێ د دووفرا هێن و یێن كومەلایەتی ژی ل ئالیەكی.
مە لكیرێ شاشی كریە؟
شاشیكرن بۆ زارۆكەكی یان كالفامەكی، رەنگە تشتەكێ ئاسایی بیت و ب پاشڤەبرنەكێ وێ شاشیێ راستڤەكەت یان دوبارە نەكەت، لێ هندەك پێشهات و روودان هەنە، لێ زڤرین بۆ نینە یان یا ئاسان نینە بهێنە راستڤەكرن ئەگەر قوربانیدان نەبیت، لڤێرە ژی قوربانیدان هەمی نە وەك ئێكن و لهندەكان، بۆ چەندین سالێن بەردەوامیدانێ، مرۆڤی دزڤرینە خالا دەستپێكیێ یان رەنگە ئەو دەرفەتا دهێتە پێش، شوونا قازانج ژێ بهێتە وەرگرتن و بۆ بەرژەوەندا نەتەوەی بهێتە (تەوزیفكرن)، دێ بخرابی مامەلە دگەلدا هێتە كرنێ و دەرفەت بخوە ژی تشتەك نینە هەر گاڤا مرۆڤی حەز كر دێ هێت، بەلكو هەر چەندین سالا ئێك دەرفەت پەیدا دبیت و كەسێن زیرەك ژی ئەون یێن بۆ خوە مفای ژێ وەردگرن.
ئەم كەسێن عاتفینە
ئایا راستە ئەم كەسێن عاتفینە؟ رەنگە بەرسڤا پسیارەكا ژڤی رەنگی گەلەك یا ئاسان بیت، ژبەركو ئەم مللەتەكین، زوو ب تشتان داخبار دبین و باوەردكەین و پێشهات كارتێكرنێ لمە دكەن، ئەڤە ژی بۆ گەلەك هوكاران دزڤریت و ژوان ژی، قەدەرا كوردان، دەردەسەری و ئەو تشتێن ب سەرێ كوردان هاتین، هەر ژ خرابكرنێ و مالوێرانیێ و دەربەدەركرنێ و كیمیا بارانكرنێ و ئەنفال و ژ ئەنجامێ ڤانە هەمیان، ئەم فێری كەلتورێ ژ دەستدانا تشتان بووینە، مە هەر دیتیە ئەم توشی كارەساتان بوینە و دەما مە بڤێت ئەم پێش بچین ژی، ئەم پێنگاڤێن خوە بلەز د هاڤێژین و وێ وێرەكیێ نادەینە خوە، كو ئەم بارودوخی باشتر بهەلسەنگینین، بوویە ئەم بێ خواندن و ڤەكولین د دووف خەونێن خوە را دكەینە غار و ئەم دجهدا د مینین.
چارەسەری
رەنگە بڤێ پەیڤێ، ئەم خوە بكەنینین، ژبەركو چارەسەری نە دەرمانەكە دێ نوژدار بۆ مە نڤیسیت و دێ بۆ خوە ل دەرمانخانێ وەرگرین و چەند رۆژەكان دێ وەك خوە زڤرینەڤە، نەخێر، چارەسەریا من مەبەست پێ، ئەم تشتێن خوە ب لوژیكانە سەر راست بكەین، مە هەلسەنگاندنێن خوە بۆ هەر پێشهاتەكا نوو هەبن، ئەم ڤەكولینان بكەین، كەسێن بسپور و شارەزا لێ كومڤەبكەین و هەمی پێشهاتان دانینە بەر سینگا خوە، ئەڤ هەلسەنگاندنێن هەنێ ژی نە بتنێ دبوارێ سیاسەتێدا، مە ڤالاتی دگەلەك ئالیاندا هەیە، بوارێ كومەلایەتی، مە یێ پشت گوهـ كری، بوارێ زانستی و پەروەردەی و دڤێ پێشكەفتن و جیهانگیریێدا، مە دەرگەهێن خوە یێن هێلاینە لتاق و هەر كەس و هەر ئەجندایەك دشێت بێ دەستووری بهێتە دناڤ سنورێن مە و باژێرێن مە و مالێن مە و مێشكێ مەدا، ئایا مە خواندنا پێدڤی بۆ ڤان تشتان هەیە، چ باشە رێ بۆ بهێتەدان و یێ نەباش ژی، ئەم بەرهەڤیێ بۆ بكەین، وەك تاڤیێ هەمی تشتی دگەل خوە نە رامالیت، دڤێت ئەم پێنگاڤەكا ژڤی جوری بهاڤێژین و هێشتا ژی نە زوویە، ئەگەر مە بڤێت ئەم دەستێ خوە دانینە سەر برینێ و تیمار بكەین.
تێبینی: ـ د رۆژناما رێگای كوردستاندا ژمارە 1134 دا ل رۆژا 24/4/2018 دا بلاڤ بوویە. بو زانین پشتی 3 سالان ژ راوەستیانێ ئەڤە ئێكەم ژمارا وێیە دەردكەڤیت و سەركەفتنێ بو دخوازین.
ليست هناك تعليقات:
إرسال تعليق