نڤیسەری! (كورتەچیرۆك)

عبدالرحمن بامەرنی

بەری چیرۆكا خوە بنڤیسیت:

ھەڤالێ منێ نڤیسەر بوو و ئەوێ ب ھەڤژین و ئەزێ زگورد، دەما من گوتیێ: من بریارا دایی ئەز ھەڤژینیێ پێكبینم! گوتە من راوەستە، تا ئەز ژ چیرۆكا خوە یا نە تەمامكری ب دووماھی دھێم، پاشی بریارا خوە بدە.

دەمێ چیرۆكا خوە دنڤیسا:

مێزا ل بەر سینگا وی، چەند پەرتووكەك یێ ل سەر و كوپەكێ ئاڤێ و خولیدانكەكا تژی قوپكێن جگارێ و ھێشتا دروست قەلەمێ خوە نەكریە دناڤ تبلێن دەستێ خوەدا، دەنگێ پت پتا ھەڤژینا وی دگەل گڤەگڤا بای و تەق تەقا پەنجەرێ تێكەلی ئێكبوون و قەلەمی خوە ژناڤ دەستێن وی ھاڤێت و دگەل وان چركەیان، كارەب ژی ھاتە برینێ و بۆ تبلچاڤكانێ.

ڤی ھرەبایێ خودێ دزانیت نوكە دار ژ رھـ و ریشالان ئیناینە دەرێ و پت پتا ھەڤژینا وی دبن لحێڤاڤە، سەرا ڤان پەنجەرەیێن ئەو دھێلیتە ڤەكری، ڤێ سرێ و ھەر گاڤا ژخەو رابوو گەھشتە پەنجەرەیان و ڤەكرن، دێ بێژی ئەڤە نەخانیە ئەو تێڤە، بەلكو كوتانا پەزییە و بێھنێ خمخمكێن دفنێن وێ یێن تژیكرین. خوە ل ھاتنا كارەبێ نەگرت و دڤێت بچیت پەنجەرەیێ بگریت و ھێشتا دروست نەرابوویەڤە و قەلەمێ د دەستێ خوەدا ل سەر مێزێ نەدانای، دەستێ وی چوو سەر كوپێ شیشەیێ تژی ئاڤ و ژ مێزێ پەشی و درنگێن ژ عەردی ئینا، دەنگێ بژكینا شیشەی تێكەلی دەنگێ قیژیێن ھەڤژینا وی بوو و گوت، دیسان ئەو چ شكەست؟!! ئێ باشە كەتنا كوپێ شیشەی ئەگەر مەحفیر یا رائێخستیبایە، دا كەڤیتە سەر مەحفیرێ و نە د شكەست و ئەڤ دەنگە ژی ژێ نەدھات، ئەڤ ھەڤژینا ژ تشتەكی نە رازی، دوو ھەیڤ دەرباز نابن، دڤێت مەحفیرێ بشووت و بێژیتە من دێ وەرە ب سەر دیواریدا ب رائێخە، ئێ زڤستان و شویشتنا مەحفیرا!

ب ھاتنا كارەبێ ژوور رۆھن بوو، پرتێن شیشەی ل ھەمی جھەكی یێن بژالە بووین و قەستكرێ، دڤێت ئێك ئێكە وان پرتان ژ عەردی ڤێكدەت و ھێشتا كەسێ خوە بریندار نەكری و سەرێ خوە ل ڤی ئالی و ل وی ئالی زڤراند و ھندی راكرین راكرین و پەحنكا پێ وی كەتە سەر پرتەكا شیشەی و ئاییێن ژێ ئینا، چەند چپكێن خوینێ خوە ژ بنێ پێ وی ھەلاڤێتن و روونشتە خارێ و پێ خوە بلندكر، ھند خەما وی ئەو نینە شیشەی ژ پێ خوە بینتە دەرێ و خوینا پێ خوە ب راوەستینیت، ھندی خەما وی چ چپكێن خوینێ نەكەڤنە سەر مەحفیرێ، ئەگەر سوبەھەی تێشت و شیڤ و فراڤینێن وی دێ ل دەرڤەی مالێ بن.

ھێشتا چیرۆك ب دووماھی نەھاتی:

نڤیسینا ڤێ چیرۆكێ درێژبوو و ئاخفتنا ھەڤژینا وی یا خوش بۆ وی، ئەو رۆژا ب رەش بیت یا من ھەڤژینی دگەل نڤیسەرەكی پێكئینای! ھندی ئاخفتنێن ب تیڤل دگوتنێ و جارەكێ من ب ڤان گوھا گوھلێ بوو، دگوتێ، ھندی من كەسەك ھەبیت و ئەز كەسەكێ ناس بكەم ژی، دێ شیرەتا لێكەم، ھەر كەسێ دوو پەیڤان ژی بدویڤ ئێكڤە رێزبكەت، كەس دگەلدا نەچیتە د جھالێ ھەڤژینیێ دا.

بریارا من یا دووماھیێ:

ئێدی من گڤشاتن ل ھەڤالێ خوە یێ چیرۆكنڤیس نەكرن و بریارا من ژی ل سەر بابەتێ كا ژنێ بینم یان نەئینم ب دووماھی بریارا منڤە گرێدایە، كا ئەز بمینم نڤیسەر یان ل كارەكێ دی بگەرم!

ـــــــــــــــــــــ

رۆژناما ئەڤرو ژمارە (3511) 2024/4/23