(1)
ـ درەنگی شەڤێ ـ
زەنگا دەرگەهی ژ خەوێ هشیار كر و خوە ل بەر دەرگەهی دیت.. ل پشت دەرگەهی، كچەكا زەند رووسا بەژن بلند و ب كراسەكێ كۆرت تا سەر چووكان سلاڤی وی كر و نامەك كرە د دەستاندا و بەرێڤەی كولانێ بوو.. ئەڤە هەر ئەو كچ بوو یا بەری بێهنەكێ برەخ ویڤە رازایی و بەری زەنگا دەرگەهی وی ژ وێ خەوێ هشیار بكەت، ئەوان داڤێن عشقەكێ درستن و دەستێن وان دناڤ ئێكدا دخۆهدایی بوون.. دەستێن خوە كێشانە بەرچاڤێن خوە و هێشتا شوون تەراتیا خوهێ پێڤە دیارە.. دەرگەهـ ل پشت خوە گرت و زەنگا تەلەفونێ نەهێلا وێ نامێ ڤەكەت، كا چ دناڤدا هاتیە نڤیسین.
ـ ئەلو.. ئەلو.. ئەز خودانا نامێ مە، دێ كەنگی بەرسڤا نامێ گەهیتە من؟
ـ هێشتا نامە یا ددەستێن مندا و هێشتا من نەخواندیە.
ئەڤە بەرسڤا وی بوو ژ بۆ وێ كچێ یا تەلەفون بۆ كری و هەمان دەنگێ وێ كچێ بوو، ئەوا ژ درەنگی شەڤێ و پێڤە بوویە مێهڤانی خەونێن وی و دەنگێ هەمان كچ بوو، ئەوا زەنگا دەرگەهی لێدایی و ب زەندكێن رووس و كراسەكێ كورت ل بەر و نامە كریە د دەستاندا.
ڤەكرنا نامێ و خواندنا وێ ژبیر كر، دەما دەنگ ژ ژوورا وی یا نڤستنێ هاتی و گازیكریێ، ئەڤە تۆ كیڤە چووی؟.. دەما قەستا ژوورا خوە كری، دیتنا زەندكێن وێ یێن رووس، جرفەك ڤێ ئێخست.. كراسێ وێ یێ كورت، چاڤێن وی بۆ خوە راكێشان و ئەڤ كراسێ نەشیایی لەشێ وێ هەمیێ ڤەشێریت، بۆ زگوردەكی، دیمەنەكێ ئاسان نینە خوە ل بەر بگریت.. ئەگەر نە گوتبایێ دێ وەرە بنڤە هێشتا زوو یە، دبیت ل سەر خوە نەمابا و رەنگە ل دەرگەهی دابا و رەڤی با یان ژی بەرەڤ لێنانگەهێ چوبایە و تشتەك ئینابا ژ بۆ بەرەڤانیكرنێ یان ژی هەر چنەبیت، چەند ئایەتەكێن قورئانێ بخوەڤە خواندبان.. بەلێ چ ژڤان لبیرێ نەمان و دەستێن خوە ب سمبێلێن خوەدا ئینانە خارێ.. ئەڤە هەمان كچە ئەوا شڤێدی من و وێ ل سەر فیس بوكی نامە دگەل ئێك دگوهارتن و هەمان كچە تا سپێدێ بوویە مێهڤانی خەونێن من و هەمان كچە، سپێدێ ئەز ژ خەو هشیار كریم و بەرەڤ دەرگەهی ڤە بریم و نامە كریە ددەستێن مندا و هەمان كچە تەلەفۆن بۆ من كری و پسیارا بەرسڤا نامێ ژ من كری و ئها ئەڤە ل سەر تەختێ من یا بتنێ یە و نیڤ رووس یا درێژ كریە.
بێی بزانیت چ دنامێدا هاتیە نڤیسین و هێشتا جلكێن خوە ژ بەر خوەدا نە ئیناین، زەنگا دەرگەهی بۆ جارا دویێ گوهێن وی تژی دەنگ كرن، لێ ڤێجارێ گوهێ خوە نەدایێ و هزرا وی ما ل سەر ئێك تشت، دڤێت چاڤێن وی خو رادەستی خەوێ نەكەن، شەڤێن ژڤی رەنگی دوبارە نابن.
(2)
ـ بەربەركێ سحارێ ـ
دەمژمێر چاری شەڤێ:
جارا دوێ یە، دڤێ نیڤە شەڤێدا بەرەڤ مێزا كومبیوتەر ل سەر دچیت و فیس بوكێ خوە ڤەدكەت.. هێشتا چاڤێن وی خەوێ بەرنەداین، هەر زوو بەرەڤ تەختێ خوە یێ نڤستنێ ڤەگەریاڤە و دەستێ خوە بۆ سەرێ وێ كرە بالیفك..
بێهنا پرچا وێ تژی خمخمكێن وی بوو، ڤیا ئەڤ شەڤە گەلەك درێژ بمینیت.
دەمژمێر چار و نیڤی شەڤێ:
ئەو هێلا دخەو و بەرەڤ مێزا كومبیوتەر ل سەر چوو، فیس بوكێ خوە ڤەكر.. دەستێن خوە دبن پرچا خوە را برن و كەزیێن خوە یێن بەردای و قژاڤژ، ژناڤ چاڤێن خوە دانە رەخەكی و پشت سەرێ خوەڤە برن.. تەزینكێن سەرمایێ و رووساتیا لەشێ وێ، ڤەگەراندە سەر تەختێ نڤستنێڤە.. دەستێ وی ژ سەر سینگێ وی راكر و سەرێ خوە پێڤەنا و دەستێ وی كێشا سەر پشتا خوە..
چاڤێن وێ نەشییان بەرگرییا حەزێن وێ بكەن و شراتییا مێیاتیا وێ، بەرەڤ نڤستنەكا دی ڤەبرن.
دەمژمێر پێنجی سپێدێ:
مێزا كومبیوتەر ل سەر و حەزا ڤەكرنا فیس بوكی، چاڤێن وی راكێشانە بەر پەنجەرێ.. روناهیێن ل سەر جاددان ژبلی مێش و موران، نەشێن چ دەمێن دەست نیشانكری بدەنێ و ژبلی نەعیمێن تەحلێن عەسمانی، هیرە بایەكێ پایزی ڤەگەراندە سەر تەختی و دیت پرچا وێ بالیفك یا رەش كری..
هێشتا ئەڤ دیمەنە ژبەر چاڤێن وی غەوارە نەبووی، خو دبەردا درێژ كر.
دەمژمێر پێنج و نیڤی سپێدێ:
ڤەخارنا قورچەكا ئاڤێ، كێشا بەر مێزا كومبیوتەر ل سەر و هێشتا چاڤێن خوە ل چەند پوستێن هەڤالێن خوە یێن فیس بوكێ نە چەراندین، دوو سێ چپكەكا خوە ژ بنێ كوپی ڤەرەساندن و ب فنجانێن مەمكێن وێدا شوور بونە خارێ.
هەر زوی خوە كێشا بەر كەلەخێ ویڤە و تێهنا مێرانیێ، رەجفكێن سەرمایێ ژ بیرێ برن.
دەمژمێر شەشی سپێدێ:
روناهیا پەنجەرێ، گەف ل تاریاتیا شەڤێ كرن.. بەری شەریتا دیمەنان ب دووماهی بهێت، میلێن سەعەتێ ل سەر ئێك سیار ببون و درەنگ وەختی پێڤە یا دیار بوو.. كر و نەدكر، پێن وی تاقەتا هلگرتنا وی ڤێ نەما بوون..
بەری چاڤێن وی باش ژێكڤە ببن، ژبلی بالیفكێ ل سەر تەختێ خوە چ نەدیت و هەست ب شەرمێ كر.
دەمژمێر شەش و نیڤێ سپێدێ:
بەری چاڤێن وێ روناهیا پەنجەرێ هەمبێز بكەن، چەق چەقا ئامانان تژی گوهێن وێ بوو.. پێن خوە یێن كێشاینە بن زكێ خوە و بالیفك یا دناڤ دەستێن خوە را شداندی..
هەر زوی خوە ب بەر ئێك ڤە ئینا و هێشتا كەسێ دەرگەهـ ل سەر ڤەنەكری، رازانا خوە راستڤەكر.
•
عبدالرحمن بامەرنی
* دكوڤارا پەیڤ ژمارە 78 دا بلاڤ بوویە
%20copy.jpg)
ليست هناك تعليقات:
إرسال تعليق