ئەز دبێژم كەسێ ژ وە گوهـ ل شكەستنا وی تشتی نەبوچنكو، وێ روژێ هین نە دگەل من بون
نوكە ژی هین نە دگەل منن!
ئەز بتنێ مە و تنێیاتی و ئەز
شەڤێن مە، بهژمارتنا ستێران ڤە دبورن
ل دەركەتنان ژی ئەم پێكڤەینە
ل كافیتریا ئەم ژ ئێك قەهوە ڤەدخوین
ل جاددان ژی پیاسێن مە ئێكن
ئەز ژ سەرەكی دهێم و ئەو ژ سەرێ دی
نە ئەز وی دبینم و نە ئەو دزانیت ئەز هەمە یان نە
گەر بو مە هەلكەڤیت، دكەینە شەر
خەبەرێن رەش و لبن كەفشێن ئێك و دوو دچین
سەرێن خوە ددانینە سەر رانێن ئێك
روندكێن ئێك پاقژ دكەین
ل هەر جهەكی بین
جهی بو ئێك دوو دگرین
ل هەر جهەكی بم
گازی دكەت، وەرە ئەڤە ئەز
بەری ئەز تنێیاتیا خوە رابگەهینم ژی
كێشەیا من یا سەرەكی
لتە ببورم یان نە؟
هەر روژ
ئەز ڤێ رستێ دكەمە بابەتێ نڤیسینەكێ و
ئەز نزانم
كەربێ ژێ هەلگرم یان تولێ ژێڤەكەم!
ئەز خوە ناكوژم
ژبەركو تو هەر روژ جارەكێ من دكوژی
ئەگەر بزانی یان نە
هەرو ئەز بخو ڤێ گوتنێ دبێژم
ئەڤرو من هەست ب تشتەكی دكر، شكەست
دەنگەكێ گەلەك جیاواز بو و
ب دەنگێ شكەستنا چ شیشان ڤە نەدچوو
وەك گولدانەكا ژ هەمی تشتەكی هاتیە چێكرن و
فرچێ هەمی وەرزان لێ هاتیە خشاندن
یا رەنگا و رەنگ،
بێهنا گولان دویراتیا تەمەنێ دەستپێكرنا چیروكا مە بو
ل سەر مێزەكێ ل پێش چاڤێن من و تە
هەمی رەنگێن وێ ژ سوری و رەنگێ عاشقان بون
نزانم لبیرا تە مایە؟
مە پێكڤە ئەو رەنگ كێشابون
گولدان دكەت
ل بەر چاڤێن مە دكەت و بێ پێژن دما
كەسێ چەپلە لێنەددان
چنكو هولەكا ڤالا بو
خو مە ژی چەپلە لێدان ژبیركربو!
ژ وێ روژێ من هەست ب شكەستنا گەلەك تشتان كر
من نەزانی لێك بدەمە ڤە
یان وەك یاریكێن زاروكان تێكەلی ئێك بكەم
من نەدزانی، تو لمن ببوری
یان ئەز، بەرگەریانا لێبورنی بكەم!
نزانم بو، ئەڤ جاددە وەك خوە درێژ نەمایە
جارەك دەستێ من ددەستێ تە دا و
جارەك دەستێن مە ب كەمەرێن مە ڤە
ل سەر وان شوستەیێن من و تە لێ پیساسە دكرن
پێنگاڤێن من یێ دخشیێن و هەمی تشتەكی خاڤ دبینم
یان وان كولانكێن مە فوتو بخو لێگرتین
ماچێن تە لێ نابینم
یاریكێن تە یێن بژالەبوین و
دەستێن من ناگرن كوم ڤەبكەمە سەر ئێك
هەر تشتێ من بەرێخو ددایێ،
من ئێشان دناڤ را ددیت
دێمێ تە یێ د دناڤ گێلەشوكەكا مروڤان را
مروڤێن نە ژ رەنگێ مە
چاڤێ من ركو رك یێ لێ
دێمێ تە یێ ل سەر چوونێ و
هەمی تشت یێ ل بەری تە دچن
بتنێ فوتویەك
نزانم لبیرا تە یە یان نە
ل بەر وی پەیكەرێ مە چیروكا خوە ل بەر ناڤكری
پەیكەرێ ئێكانە ل دهوكێ
یان وی باخچەیێ لبن دار هنارەكا وێ
تا نوكە ژی دەما ئەز شعرەكێ دنڤیسم
ترشاتی تژی بن پەحنكا ئەزمانێ من دبیت و
ئەز هەست دكەم
دگەل تنێیاتیێ دێ هەبم و دێ دگەل مالئاڤاهیێ كەم
ژبەركو ئەو من لپێش خوە دئێخیت
ل كومبونان ژی من ل رەخ خوە ددانیت
ل خارنگەهان ژی، لبێن زەیتونان دهاڤێتە دەڤێ من و
دەمێ ئەز خەونان ژی دبینم، ئەو لایە لایێ دبێژیت..
ليست هناك تعليقات:
إرسال تعليق